வனத்துறை சார்பில் சமையலறைத் தோட்டம் குறித்த பயிற்சி: 1000 மரக்கன்றுகள் வழங்கல்!

விளாத்திகுளம் ஊராட்சி ஒன்றியத் தொடக்கப்பள்ளி மற்றும் அக்லூட் சிறப்புப் பள்ளியில், விளாத்திகுளம் வனச்சரக அலுவலகம் சார்பில் சமையலறைத் தோட்டம் அமைப்பது குறித்த வழிகாட்டுதல் மற்றும் பயிற்சி முகாம் நடைபெற்றது.

மாவட்ட வன அலுவலர் இளையராஜா அறிவுறுத்தலின்படி, விளாத்திகுளம் வனச்சரக அலுவலர் கனிமொழி அரசு தலைமையில் இப்பயிற்சி நடைபெற்றது. விளாத்திகுளம் வனவர் பாண்டியராஜ் மற்றும் ஊராட்சி ஒன்றியத் தொடக்கப்பள்ளி தலைமை ஆசிரியர் இந்திராணி ஆகியோர் முன்னிலை வகித்தனர்.

இந்த முகாமில் மாணவ-மாணவிகளுக்கு கத்திரிக்காய், அவரைக்காய், வெண்டைக்காய் மற்றும் தக்காளி உள்ளிட்ட காய்கறி விதைகளை நடவு செய்யும் முறை, செடிகளை இயற்கை முறையில் பராமரித்து, ரசாயனமற்ற காய்கறிகளை உற்பத்தி செய்யும் தொழில்நுட்பங்கள் குறித்து பயிற்சிகள் வழங்கப்பட்டன. ஆரோக்கியமான உணவுப் பழக்கம், சுற்றுச்சூழல் பாதுகாப்பு மற்றும் பசுமை வளர்ப்பின் அவசியம் குறித்து மாணவர்களிடையே கலந்துரையாடப்பட்டது.

பயிற்சியின் நிறைவில் பங்கேற்ற 270 மாணவ-மாணவிகளுக்குப் பயிற்சி சான்றிதழ்கள் வழங்கப்பட்டன. மேலும், பசுமையை ஊக்குவிக்கும் வகையில் 1000 மரக்கன்றுகள் வழங்கப்பட்டு, அவற்றை நட்டுப் பராமரிப்பது குறித்த ஆலோசனைகளும் வழங்கப்பட்டன. இந்த நிகழ்ச்சியானது பள்ளி மாணவர்களிடையே சுற்றுச்சூழல் பாதுகாப்பு மற்றும் சுய உணவு உற்பத்தி குறித்த ஆர்வத்தை ஏற்படுத்தியுள்ளதாக ஆசிரியர்கள் மகிழ்ச்சியுடன் தெரிவித்தனர்.