மகளிர் சுய உதவிக்குழுக்களுக்கான சிறப்பு வாழ்வாதாரத் திட்ட டிஜிட்டல் தளம்: ஆட்சியர் தொடங்கி வைத்தார்!

தூத்துக்குடி மாவட்ட ஆட்சியர் அலுவலகக் கூட்டரங்கில், மாவட்ட நிர்வாகம் மற்றும் ‘அஹோப்’ (aHOPE) நிறுவனம் இணைந்து மகளிர் சுய உதவிக் குழுக்களுக்காக உருவாக்கியுள்ள 'சிறப்பு வாழ்வாதாரத் திட்டம்' (Special Livelihood Initiative - SLI) மற்றும் அதற்கான பிரத்யேக இணையதளத்தை மாவட்ட ஆட்சியர் க.இளம்பகவத் இன்று (20.02.2026) தொடங்கி வைத்தார்.

கிராமப்புறப் பெண்களின் வாழ்வாதாரத்தை மேம்படுத்தவும், அவர்களுக்கு நிலையான வருமான வாய்ப்புகளை உருவாக்கவும் இத்திட்டம் வடிவமைக்கப்பட்டுள்ளது. சுமார் ₹170 கோடி மதிப்பிலான நிதித் திரட்டலுடன், மாவட்ட ஆட்சியரின் நேரடித் தலைமையில் இத்திட்டம் செயல்படுத்தப்படுகிறது.

சுய உதவிக் குழு உறுப்பினர்களுக்கு மாடு, ஆடு மற்றும் கோழி வளர்ப்பு போன்ற தொழில்களுக்காகச் சிறு கடன்கள் வழங்கப்படுகின்றன. அஹோப் (aHOPE) எனும் 'பின்டெக்' (FinTech) நிறுவனம் மூலம், பயனாளி பதிவு முதல் உற்பத்திப் பொருட்கள் சந்தைப்படுத்துதல் வரை அனைத்தும் டிஜிட்டல் முறையில் கண்காணிக்கப்படும்.

வெளிப்படைத்தன்மை: வங்கிகள், ஊராட்சி கூட்டமைப்புகள் (PLF) மற்றும் கொள்முதல் செய்பவர்கள் என அனைத்துப் பங்குதாரர்களும் இத்தளத்தின் மூலம் ஒருங்கிணைக்கப்பட்டுள்ளனர்.

இதுவரையிலான சாதனைகள்: நிகழ்ச்சியில் மாவட்ட ஆட்சியர் பேசியபோது, இத்திட்டத்தின் கீழ் இதுவரை அடைந்துள்ள முன்னேற்றங்களைப் பட்டியலிட்டார்: இதுவரை 2,500 மகளிர் சுய உதவிக் குழு உறுப்பினர்கள் நேரடியாகப் பயனடைந்துள்ளனர். மே 2025 முதல் ஜனவரி 2026 வரை 1,200 ஆடுகள், 850 மாடுகள் மற்றும் 70,000 கோழிகள் வாங்கப்பட்டுள்ளன.

20 கோடி கடன் வழங்கப்பட்டு, 95 சதவீதத் திருப்பிச் செலுத்தல் விகிதம் எட்டப்பட்டுள்ளது. 100 ஊராட்சி கூட்டமைப்பு உறுப்பினர்களுக்குத் தொழில்நுட்பப் பயிற்சி அளிக்கப்பட்டுள்ளது. இத்தளம் மூலம் கால்நடை ஆரோக்கியத்தைக் கண்காணித்தல், காப்பீடு பெற உதவுதல் மற்றும் ஆவின் மூலம் பால் கொள்முதலை ஒருங்கிணைத்தல் போன்ற பணிகள் எளிதாக்கப்பட்டுள்ளன. பயனாளிகள் தங்கள் கடன் விவரங்கள் மற்றும் திருப்பிச் செலுத்தும் நிலையை உடனுக்குடன் தெரிந்துகொள்ளலாம்.

இத்திட்டம் குறித்த கூடுதல் விவரங்கள் மற்றும் வழிமுறை கையேடுகளை https://linktr.ee/ahope2026 என்ற இணையதளம் அல்லது க்யூஆர் கோடு (QR Code) வாயிலாகப் பொதுமக்கள் அறிந்துகொள்ளலாம் என ஆட்சியர் தெரிவித்தார். இந்நிகழ்வில் பயிற்சித் துணை ஆட்சியர் மகேந்திரன், அஹோப் நிறுவனத் தலைவர் அஜித் மத்தாய் மற்றும் அரசு அலுவலர்கள் கலந்துகொண்டனர்.