தயவுசெய்து இணையதளத்தில் படம் பார்க்காதீர்கள் : தூத்துக்குடியில் நடிகர் சூரி பேட்டி

"திருட்டுத்தனமாக யாரும் இணையதளத்தில் படத்தை போடாதீர்கள். அப்படியே போட்டாலும் அதை யாரும் பார்க்காதீர்கள்" என்று நடிகர் சூரி ரசிகர்களுக்கு வேண்டுகோள் விடுத்தார். 

தூத்துக்குடி பாலகிருஷ்ணா திரையரங்கில் மாமன் திரைப்படம் வெளியாகி உள்ளது. இன்று மாலை நடிகர் சூரி திரையரங்கிற்கு வந்து படம் பார்த்துக் கொண்டிருந்த மக்களை சந்தித்து பேசினார். அப்போது அவர் கூறுகையில், "திரையரங்குகளில் திரைப்படம் வெளியாகி ஓடிக் கொண்டிருக்கும்போது இணையதளத்தில் படத்தை வெளியிடுபவர்கள் இது குறித்து யோசிக்க வேண்டும். 

மக்கள் முடிந்த அளவிற்கு இணையதளத்தில் திரைப்படம் பார்க்காதீர்கள். திரையரங்கில் பெரிய ஸ்கிரீனில் பார்க்கும் அளவிற்கு வராது. திருட்டுத்தனமாக இணையதளத்தில் படத்தை வெளியிடுபவர்களுக்கு சொல்கிறேன், 100 கோடி 200 கோடி என்று செலவு செய்து படத்தை எடுத்து அந்த படத்தை மக்களிடம் கொண்டு சேர்த்து விட்டு படத்திற்கான ரிசல்ட் எப்படி இருக்கும்? எப்படி வரும்? என்று உயிரை கையில் பிடித்துக் கொண்டு இருக்கும் படத்தில் நடித்தவர்களும் சரி, தயாரித்தவர்களும் சரி, அந்த வலி பயங்கரம். 

தயவுசெய்து திருட்டுத்தனமாக யாரும் இணையதளத்தில் படத்தை போடாதீர்கள். அப்படியே போட்டாலும் அதை யாரும் பார்க்காதீர்கள் என்று கையெடுத்து கும்பிட்டு கேட்டுக்கொண்டார். புரட்டாவிற்கு பேமஸான தூத்துக்குடியில் போகும்போது அப்படியே இரண்டு பரோட்டாவை தட்டி விட்டுட்டு போக வேண்டியது தான். தூத்துக்குடி பரோட்டா என்றால் இரண்டு தான் சாப்பிடுவீர்களா? என்ற கேள்விக்கு முதல்ல ரெண்டு சாப்பிடுவோம் பிறகு நல்லா இருந்தா 10 பார்சல் வாங்கிட்டு போகும் வழியில் சாப்பிட்டுக் கொண்டே போவோம் என்றார்