புனித சந்தியாகப்பர் ஆலய திருவிழாவில் சப்பர பவனி : திரளான பக்தர்கள் பங்கேற்பு

ஸ்ரீவைகுண்டம் புனித சந்தியாகப்பர் ஆலய திருவிழாவில் இன்று சப்பர பவனி நடந்தது. விழாவில் திரளான பக்தர்கள் கலந்து கொண்டனர்.

தூத்துக்குடி மாவட்டத்தில் உள்ள பழமைவாய்ந்த பிரசித்தி பெற்ற கிறிஸ்தவ ஆலயங்களில் ஸ்ரீவைகுண்டம் புனித சந்தியாகப்பர் ஆலயமும் ஒன்றாகும். ஸ்ரீவைகுண்டம் வடகால் கரையில் அமைந்துள்ள இந்த ஆலயம் ‘குருசு கோவில்‘ என்றும் அழைக்கப்படுகிறது. இந்த ஆலயத்தில் 421–வது ஆண்டு திருவிழா கடந்த 16–ந்தேதி கொடியேற்றத்துடன் தொடங்கியது.

தொடர்ந்து 10 நாட்கள் நடந்த திருவிழா நாட்களில் தினமும் திருப்பலி, மறையுரை, நற்கருணை ஆசீர் நடந்தது. 10–ம் திருநாளான இன்று அதிகாலையில் தொடர் திருப்பலிகள் நடந்தன. காலை 7 மணி அளவில் தூத்துக்குடி மறைமாவட்ட ஆயர் தலைமையில் திருவிழா திருப்பலி நடந்தது. காலை 11 மணிக்கு சப்பர பவனி நடந்தது. தேரில் எழுந்தருளிய பரிசுத்த தேவமாதா, புனித சந்தியாகப்பர், புனித செபஸ்தியாருக்கு ஏராளமானவர்கள் உப்பு, மிளகு, மாலை, மெழுகுவர்த்தி காணிக்கை செலுத்தி வழிபட்டனர்.