தூத்துக்குடியில் 2வது நாளாக அரசு போக்குவரத்து கழக ஊழியர்கள் ஸ்ட்ரைக்: மக்கள் அவதி!

தூத்துக்குடியில் இன்று 2வது நாளாக அரசு போக்குவரத்து கழக ஊழியர்கள் வேலைநிறுத்தத்தில் ஈடுபட்டுள்ளதால் பெரும்பாலான பேருந்துகள் இயக்கப்பட வில்லை. 

போக்குவரத்து தொழிலாளர்களின் ஊதிய ஒப்பந்தம் குறித்த பேச்சுவார்த்தைக்கு அழைக்க வேண்டும்  என்று வலியுறுத்தி தமிழகம் முழுவதும் போக்குவரத்து தொழிலாளர்கள் வேலை நிறுத்த போராட்டத்தில் ஈடுபட்டுள்ளனர். இன்று 2வது நாளாக வேலை நிறுத்த போராட்டம் தொடர்கிறது. தூத்துக்குடி மாவட்டத்தில் டவுண், புறநகர், கோவில்பட்டி, விளாத்திகுளம், ஸ்ரீவைகுண்டம், திருச்செந்தூர், சாத்தான்குளம் உள்ளிட்ட டிப்போக்களில் இருந்து 299 பேருந்துகள் இயக்கப்பட்டு வருகிறது. இதில் 1382 ஓட்டுநர்கள், நடத்துனர்கள் பணிபுரிந்துவருகின்றனர். 

இன்று மாவட்ட முழுவதும் உள்ள 7 டிப்போக்களில் இருந்து 116 பேருந்துகள் இயக்கப்படுகிறது. தற்காலிக டிரைவர்கள் மூலம் பேருந்துகள் இயக்கப்படுகிறது. மேலும் கோரிக்கைகளை வலியுறுத்தி தூத்துக்குடி பழைய பேருந்து நிலையம் முன்புள்ள போக்குவரத்து பணிமனை முன்பு தொழிலாளர் கூட்டமைப்பு சங்கத் தலைவர் மரியதாஸ் தலைமயில் ஆர்ப்பாட்டம் நடந்தது. ஆர்ப்பாட்டத்தில் ஜான் கென்னடி, கருப்பசாமி, ராமசாமி, பெரின் பிரின்ஸ், வேலாயுதம், செல்வராஜ் உட்பட 100க்கும் மேற்பட்ட போக்குவரத்து தொழிலாளர்கள் கலந்து கொண்டனர். பெரும்பாலான பேருந்துகள் ஓடாததால் பொதுமக்கள் பாதிக்கப்பட்டுள்ளனர்.