தகாத வார்த்தையால் திட்டும் பள்ளி ஆசிரியைகள் : ஆட்சியரிடம் குழந்தைகளின் தாயார் புகார்

பள்ளியின் படிக்கும் தனது இரு மகள்களையும் ஆசிரியைகள் தகாத வார்த்தையில் திட்டுவதாக கூறி தூத்துக்குடி மாவட்ட ஆட்சியரிடம் பெண் புகார் அளித்தார்.

தூத்துக்குடி மாவட்டம், எட்டையபுரம் தாலூகா, நென்மேனி காலனி தெருவைச் சேர்ந்தவர் சோலைராஜ் மனைவி விஜயா. இவர் தூத்துக்குடி மாவட்ட ஆட்சியரிடம் அளித்த மனுவில் கூறியிருப்பதாவது நானும் என் கணவரும் காதல் திருமணம் செய்து கொண்டோம். எங்களுக்கு 2 பெண் குழந்தைகள் உள்ளனர். என் கணவரின் நடத்தை சரியில்லாததால் நான் கடந்த 4 ஆண்டுகளாக கணவரை பிரிந்து குழந்தைகளுடன் வாழ்ந்து வருகிறேன். கூலி வேலை செய்து வாழ்க்கை நடத்தி வருகிறேன். எனது குழந்தைகள் இருவரும் அயன்ராஜாபட்டியில் உள்ள இராதாகிருஷ்ணா தொடக்கப் பள்ளியில் படித்து வருகிறார்கள். 

அங்குள்ள ஆசிரியைகள் தமிழரசி, ராதா ஆகிய இருவரும் எனது கணவர் குடும்பத்துடன் சேர்ந்து கொண்டு எனது மகள்களை தகாத வார்த்தையால் திட்டி வருகிறார்கள். இதுகுறித்து நான் சைல்டு லைனில் நான் புகார் அளித்ததால் அதிகாரிகள் விசாரணை நடத்தினர். இதன் பின்னர் ஆசிரியைகள் இருவரும் என்னை மிரட்டி, குழந்தைகளின் டிசியை பெற்றுக் கொள்ளுங்கள் என்று கூறிவிட்டார்கள். மேலும் எனது கனவரும் என்னை கொலை செய்து விடுவேன் என்று மிரட்டி வருகிறார். எனவே, எனது குழந்தைகள் கல்வி தொடரவும் எனக்கு உரிய பாதுகாப்பு வழங்கவும் காவல்துறை மூலம் நடவடிக்கை எடுக்க வேண்டும் என மனுவில் தெரிவித்துள்ளார்.