» செய்திகள் - விளையாட்டு » மாவட்ட செய்தி (தூத்துக்குடி)

தமிழ்நாட்டில் சதிச்செயல்கள் நடந்து வருகிறது : மத்திய அமைச்சர் பொன்.ராதாகிருஷ்ணன்

ஞாயிறு 15, ஏப்ரல் 2018 9:25:03 PM (IST)



எந்த திட்டங்களையும் நிறைவேற்றவிடாமல் தமிழ்நாட்டில் சதிச்செயல்கள் நடந்து வருகிறது என்று மத்திய கப்பல்துறை மற்றும் நிதித்துறை இணை அமைச்சர் பொன்.ராதாகிருஷ்ணன் செய்தியாளர்களிடம் தெரிவித்தார்.

தூத்துக்குடி வ.உ.சி. துறைமுகம் சார்பில் நடைபெற்ற பல்வேறு நிகழ்ச்சிகளில் பங்கேற்பதற்காக வந்த மத்திய கப்பல்துறை மற்றும் நிதித்துறை இணை அமைச்சர் பொன்.ராதாகிருஷ்ணன் செய்தியாளர்களை சந்தித்தார். அப்போது அவர் கூறுகையில், எந்த திட்டமும் பாதிப்பு ஏற்படும் என உணரும் போது ஆரம்பத்திலே தடுக்க வேண்டியது மக்கள் மற்றும் அரசின் கடமையாகும். ஸ்டெர்லைட் தொழிற்சாலை வேண்டாம் என தூத்துக்குடி குரூஸ்பர்னாந்து சிலை அருகில் 4நாட்கள் உண்ணாவிரதம் இருந்தவன் நான். அப்பொழுது மக்கள் ஆதரவு தரவில்லை. வேலை வாய்ப்பு கிடைக்கும் என்று நம்பினர்.

தற்போது ஆயிரக்கணக்கான கோடிகளில் முதலீடு செய்த பின்னர், பாதிப்புகள் இல்லையென்று அரசு ஒப்புதல் கொடுத்து திட்டத்தை ஏற்றுக்கொண்டுள்ளனர். அன்று என்னிடம் டீல் பேச அந்த நிறுவனம் ஆட்களை அனுப்பியது. நான் முடியாது என்று கூறிவிட்டேன். அதே நிலையில் தான் இன்றும் நான் கடைபிடித்து வருகிறேன். அந்த தொழிற்சாலைக்கு அன்று ஆட்சியில் இருந்த திமுக, அதிமுக, மத்தியில் இருந்த காங்கிரஸ் கட்சியினர் ஸ்டெர்லைட் தொழிற்சாலைக்கு அனுமதி அளித்தனர். ஸ்டெர்லைட் விசயத்தில் மாநில அரசு என்ன முடிவு எடுக்கிறது என்பதை பார்ப்போம்.

தற்போது தமிழ்நாட்டில் சதிச்செயல்கள் நடந்து வருகிறது. அது எந்த சக்திகள் என்பதனை கண்டுபிடிப்பது தமிழக அரசின் வேலை. பத்திரிக்கையாளர்களை மிஞ்சிய சக்தியாக வாட்ஸ் ஆப், பேஸ்புக் ஆகியவை திகழ்கிறது. அங்கீகாரமுள்ள  மீடியாக்களை கூட தங்கள் வலைக்குள் சிக்க வைக்கிறார்கள். உண்மை செய்திகளை வெளியிட்டு அதை தடுக்க வேண்டிய கடமை மீடியாக்களுக்கு உண்டு. காவலர்களை அடித்தால் என்ன தப்பு, பத்திரிக்கையாளர்களை அடித்தால் என்ன தப்பு என்று சில சமூக விரோதிகள், தலைவர்களாக வலம் வருகின்றனர். தடி எடுத்தவர்களெல்லாம் தண்டல்காரர்களாக மாறும் சூழ்நிலை ஏற்பட்டுள்ளது. 

தூத்துக்குடியில் ஸ்டெர்லைட் போராட்டத்தில் பிரதமர் மோடியை கண்டித்து போராட்டக்குழுவினர் கோஷம் எழுப்பியது குறித்து கேட்ட போது, யாரால் அந்த சக்திகளுக்கு ஆபத்து வருமோ அவரை குறைகூறுகின்றனர். உண்மையிலே ஒரு விசயத்தில் பாதிப்பு இருக்குமென்றால் அரசு அதை ஆய்வு செய்து தடுக்க வேண்டியது அரசின் கடமை. பாதிப்பு இல்லையென்றால் அதை மக்களிடம் தெளிவுபடுத்தி இது மக்களுக்கான அரசு எனபதனை நிருபிக்க வேண்டும். பாரதிராஜா போன்றவர் தமிழ் சமுதாயத்தின் சிறந்த சிந்தனைவாதி. அவரையே தவறான வழிக்கு அழைத்துச்செல்கின்றனர் என்றார். 

பேட்டியின்போது துறைமுக சபை உறுப்பினர் ராஜகண்ணன், பாஜக‌ மாவட்ட தலைவர் பாலாஜி, பொதுச்செயலாளர் சிவராமன் ஆகியோர் உடனிருந்தனர்.


மக்கள் கருத்து

தெர்மல் சொ.ராஜாApr 15, 2018 - 10:29:10 PM | Posted IP 172.6*****

தங்கள் மீது எப்போதும் உயர்ந்த மதிப்பு வைத்திருக்கும் நபர்களில் நானும் ஒருவன். இரண்டு நாட்களுக்கு முன்பு தாங்கள் இந்த ஆலைக்கு எதிராக 4 நாட்கள் பேராசிரியை பாத்திமாபாபு அவர்களோடு போராட்டம் செய்ததை சொல்லும் போது உங்கள் மேல் உள்ள மரியாதை கூடுகிறது. அறியாமல் இருந்த காலம் மாறி பட்டறிவோடு மக்கள் வேதனையுடன் வேண்டி கேட்டுக் கொள்வதை தாங்கள் அறிவீர்கள் என்பதால் பிரதமர் அவர்களிடம் தகுந்த முறையில் எடுத்துறைத்து நச்சுஆலை ஸ்டெர்லைட் யை உடனடியாக அகற்ற வேண்டுகின்றேன்

மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.



மேலும் தொடரும் செய்திகள்

Sponsored Ads

Nalam Pasumaiyagam


CSC Computer Education


Joseph Marketing



Anbu Communications

New Shape Tailors

Black Forest Cakes



Thoothukudi Business Directory