அடுத்த மூன்று ஆண்டுகளில் சூரிய சக்தி மூலம் 1,000 மெகா வாட் மின்சாரம் உற்பத்தி

» செய்திகள் » இந்தியா

செவ்வாய் 27, ஜூலை 2010 11:00:34 AM (IST)

அடுத்த மூன்று ஆண்டுகளில், நம் நாட்டில் சூரிய சக்தி மூலம் 1,000 மெகா வாட் மின்சாரம் உற்பத்தி செய்ய முடியும் என மத்திய மின்துறை அமைச்சர் சுஷில்குமார் ஷிண்டே தெரிவித்தார். இதில் 500 மெகா வாட் சூரிய வெப்பத்தின் வாயிலாகவும், மற்றொரு 500 மெகா வாட் சூரிய ஒளி வாயிலாகவும் பெறப்படும் என அவர் கூறினார்.

மத்திய அரசுக்கு சொந்தமான பவர் ஃபைனான்ஸ் கார்ப்பரேஷன் மற்றும் ரூரல் எலக்ட்ரிஃபிகேஷன் கார்ப்பரேஷன் ஆகிய நிறுவனங்கள் மின் உற்பத்தி திட்டங்களுக்கு தேவையான நிதி உதவி வழங்கி வருகின்றன. ரூரல் எலக்ட்ரிஃபிகேஷன் கார்ப்பரேஷன் கிராமப்புறங்களில் அமைக்கப்படும் மின் உற்பத்தி திட்டங்களுக்கு கடன் வசதி அளித்து வருகிறது. இந்த இரண்டு நிறுவனங்களின் ஆதரவுடன் 2013-ஆம் ஆண்டுக்குள் 1,000 மெகா வாட் சூரிய மின் சக்தி உற்பத்தி செய்ய திட்டமிடப்பட்டுள்ளது.

ஜவஹர்லால் நேரு தேசிய சூரிய சக்தி திட்டத்தின் கீழ் இந்த நிறுவனங்கள் நிதி உதவி வழங்க உள்ளன. இத்திட்டத்தின் வாயிலாக, அடுத்த 12 ஆண்டுகளில் சூரிய சக்தி மூலம் 20,000 மெகா வாட் மின்சாரம் உற்பத்தி செய்ய இலக்கு நிர்ணயம் செய்யப்பட்டுள்ளது. இப்பணி மூன்று கட்டங்களாக மேற்கொள்ளப்படும். 2013-ஆம் ஆண்டு வரை முதல் கட்டமும், 2017-ஆம் ஆண்டு வரை இரண்டாவது கட்டமும், 2022-ஆம் ஆண்டு வரை மூன்றாவது கட்டமும் செயல்படுத்தப்பட உள்ளன.

தற்போது நம் நாட்டில் ஆண்டுக்கு 5 மெகா வாட்டுக்கும் குறைவான அளவில்தான் சூரிய மின்சக்தி உற்பத்தி செய்யப்படுகிறது என்பது குறிப்பிடத்தக்கது. ஐந்தாண்டு திட்டங்கள் பத்தாவது ஐந்தாண்டு திட்ட காலத்தில் (2002-2007) அனைத்து திட்டங்கள் வாயிலாக கூடுதலாக 42,000 மெகா வாட் மின்சாரம் உற்பத்தி செய்ய இலக்கு நிர்ணயம் செய்யப்பட்டிருந்தது.

ஆனால் இதில் 50 சதவீதமே (21,000 மெகா வாட்) எட்டப்பட்டது. நடப்பு ஐந்தாண்டு திட்ட காலத்தில் (2007-2012) நாட்டின் மொத்த மின் உற்பத்தி உற்பத்தி திறனை மேலும் 62,000 மெகா வாட் அளவிற்கு உயர்த்த இலக்கு நிர்ணயம் செய்யப்பட்டிருந்தது. ஆனால், கூடுதலாக 55,000 மெகா வாட் அளவிற்கே மின் உற்பத்தி திறனை அதிகரிக்க முடியும் என்ற நிலை உள்ளது என மத்திய மின்சார அமைச்சக வட்டாரங்கள் தெரிவித்துள்ளன.

எதிர்வரும் 12-வது ஐந்தாண்டு திட்ட காலத்தில் (2012-2017) கூடுதலாக 78,700 மெகா வாட் மின்சாரம் உற்பத்தி செய்யும் வகையில் இலக்கு நிர்ணயிக்கப்பட்டுள்ளது.